موضوع جديد لكل مرشد سياحي مفيد

بناءاً على طلب الجماهير الغلابة من طلاب قسم الإرشاد السياحي بكليتي كلية سياحه وفنادق المنيا وصاحبة الفضل عليا حيث تخرجت
قمت بهذا الشرح المبسط للألقاب الملكية
ولو محتاجين أي حاجة تانية انا في الخدمة

ببساطة شديدة جداً كان لكل ملك مصري 5 ألقاب ملكية بيحملهم أول ما بيمسك الحكم على طول
وخللوا بالكم من حكاية اول ما يمسك الحكم دي يعني انا مثلاً اسمي محمد علي المصري مش باشا ههههههه ... وانا امير لسة مبقتش ملك
هيبقى ليا اسم عادي خالص ولكن لو بقيت ملك ايه اللي هيحصل؟؟؟
هيضاف لإسمي 5 ألقاب تانية هتتدمج مع الإسم بتاعي لأغراض دينية وسياسية .. بتعبر عن
علاقة الملك بالمعبود (ولا اله الا الله) وعلاقته بتوطيد الحكم وهنبدأ بأول إسم بياخده الملك لما بيمسك الحكم

اللقب الحوري:

ظهر في مرحلة ما قبل الأسرات
واتسمى بالحوري لأن اسم الملك بيتكتب جوا علامة السرخ (علامة تمثل القصر الملكي ظهرت قبل ظهور الخرطوش)
وجنب العلامة دي بيترسم حورس ..... ليه بقى بنرسم حورس؟؟
طبعاً كلكم عارفين اسطورة اوزريس وست والصراع اللي حصل بينهم وان اوزيريس فضل انه يحكم العالم الآخر
وولى ابنه حورس (بعد ما انتصر على عمه ست) انه يحكم البشر ... وبما ان الملك هو اللي بيحكم البشر
اذن اصبح الملك هو حورس (الحكم الدنيوي) ولما بيموت بيبقى اوزيريس وبيحكم العالم الآخر ... يبقى أي ملك بيمسك
الحكم بيبقى حورس ... اللي مش فاهم يسأل
وبما ان الملك بيبقى حورس اذن لازم يعبر عن ده جنب اسمه .. اول ما بيتولى مقاليد الحكم
لقب حور نوب:
وهو بتمثل في الطائر الصقر (حورس) واقف على علامة (نوب) واللتي تعني ذهب
في رأيين اتقالوا في اللقب ده ... أولهم ترجم كلمة حور نوب بمعنى حورس الذهبي ... طب اشمعنى حورس الذهبي
محدش عارف!!! ... لكن في رأي تاني وهو الأرجح ترجم كلمة حور نوب بمعنى حورس المنتصر على (نوبت) وزي
ما احنا عارفين ان نوبت (تعني الذهبية) هي المدينة اللي كانت أكبر مركز لعبادة (ست) وطبعاً بما ان حورس قدر
يتغلب على مدينة نوبت يبقى ده معناه انه اتغلب على معبودهم الرئيسي (عمه ست) وده بيتوافق تماماً مع اسطورة
اوزيريس وست ....
ولما الملك بياخد اللقب ده بيأكد للناس ان حكمه شرعي (حورس) قضى على الحاكم المغتصب (ست) زي اتحاد الطلبة
المعين واتحاد الطلبة الحر كدة
اللقب النبتي:
واللقب ده معناه الربتين (المعبودتين) (لا اله الا انت سبحانك اني كنت من الظالمين)
قبل ما الملك نعرمر يوحد القطرين كانت مصر بتدين بالعبادة لمعبودتين (لا إله إلا الله) رئيسيتين
واحدة للشمال وهي الحية (واجيت) وكانت بتتعبد في بوتو (كفر الشيخ) عاصمة مصر السفلى (الشمال)
قبل الوحدة ... أما الجنوب فكان بيدين بالعبادة لطائر الرخمة (نخبت) وكان مركز عبادتها مدينة الكاب في اسوان
بعد الوحدة بقى كان لازم ... الملك يثبت للرعية انه مسيطر على الشمال والجنوب ... وبما ان الدين دائماً هو حصان
طروادة اللي بتغزى به قلوب الغلابة .. كان لازم الملك يدعي انتسابه للربتين نخبت وواجيت .. عشان يأكد انه مسيطر
على الشمال والجنوب  ظهر اللقب ده في الأسرة الأولى على آثار الملك دن
لقب السا رع:
ويعني ابن الشمس
ظهر اللقب ده في الأسرة الرابعة ... وكان ده شئ بديهي جداً .. لأن زي ما احنا عارفين ان ملوك الأسرة الرابعة كانوا
آكثر الملوك تقرباً للشمس دخلوها في اسمائهم (خفرع – جدفرع – منكاورع) وبنوا الأهرامات .. بإختصار كان
الملك بياخد اللقب ده عشان يأكد للناس انه ابن رع وده بيخليه ملك شرعي .. ده راجل بركة جاي من نسل (المعبود رع)
بذات نفسه ... يعني اللي بينورلنا حياتنا ولما بيغرب بيروح ينور للناس في العالم الآخر ... 
وكان السارع بيعتبر اسم الميلاد للملك يعني لما كان ولي العهد بيتولد على طول بياخد الإسم ده عشان يمهد للناس انه
لما هيجي يحكمهم مش هيبقى ملك عادي لأ ده متوصي عليه من فوق ... من عند رع
لو مسكتوا الجنيه وخليته حوافه متقابلتين هيطلعلكم اللقب ده
لقب النسو بيتي:
وده بيعتبر أهم لقب بياخده الملك ... ظهر في الأسرة الأولى على آثار الملك دن .. بس ما استخدمش رسمياً
غير في الأسرة التالتة ... المهم الإسم معناه ايه؟؟ ... الإسم معناه ملك مصر العليا والسفلى ... زي ما احنا عارفين
ان مصر طول عمرها متقسمة اتنين حتى في ايام الوحد ولغاية دلوقتي .. بنقول صعايدة وبحاروة ... وكدة
فكان لازم الملك يثبت للشعب انه مسيطر على الشمال والجنوب (زي اللقب النبتيٍ .. كدة) وكان بيتمثل بعلامة
النحلة (بيت) وهي رمز للشمال وعلامة نبات (السو) وهو رمز للجنوب ...
في لقب تاني ظهر في الأسرة الرابعة ... بس مكنش مستخدم اوي .. وكان الناس بتطلقه على الملوك الجامدة بس
زي الملك سنفرو وهو لقب (نثر نفر) ويعني الإله الطيب ... وده كان بيضفى نوع من القداسة والنأليه على حامل اللقب ده
ودمتم سالمين ...